Kini Kini tingga di gaduang
Karano lah lamo dirantau
Indak nio pulang ka kampuang
Ikan pantau di dalam banda
Dipapeh buliah dimakan jangan
Jan rantau selalu dipuja
Abehkan pulo kampuang halaman
Sungguah pun kayo di rantau urang
Jaleh lah rantau urang nan punyo
Kok nyo demo badan tabuang
Ka babaliak juo ka ranah bundo
Nasi lamak makan jo randang
Randang dimasak jo karambia tuo
Oi sanak nan di tanah subarang
Subarang jan dijadikan kampuang kito
Pado den lalu ka jam gadang
Rancak den lalu ka janjang 40
Pado bansaik den baok pulang
Rancak den marantau jauah
Duo tigo kuciang balari
Bakaja-kaja marabuik tulang
Kok disasa bana badan tu kini
Badan lah laruik di rantau urang
Tasabuik di dalam diari
Banu ampu jo singapua
Hiduik jo sakik di lua nagari
Namun kampuang jan sampai tajua
Lah kanyang paruik kabau
Sasudah makan batang padi
Lai indak mamuja rantau
Pulang juo sakali-sakali
Kuciang aia si kuciang balang
Manyingkok tuduang mancilok ikan bilih
Bukan denai ndak taragak pulang
Satiok hari indak bapitih
Maninjau di lingkuang bukik
Tampak nan dari puncak lawang
Di rantau piti kok sarik
Ka pulang nagari langang
Dari batipuah ka subarang
Singgah lalu di salayan
Padiah hiduik di rantau urang
Manangguang nasib jo parasaian
Pusaro cino di gunuang padang
Pacuan kudo di bukik ambacang
Jikok seso nan ditangguang di rantau urang
Bilo masonyo ka taliek kampuang surang
Mandaki ka bukiktingi.
Manurun ka sawah lunto.
Di rantau awak ko kini.
Kampuang halaman jan sampai lupo
Hujan ameh di rantau urang
Hujan batu di nagari kito
Nagari kito juo nan kito sayang
Bak itu bana bunyi tambo
Kalapau mari kalapau
Kalapau mambali jaguang
Dirantau kito dirantau
Sakali sakali pulang juo kakampuang
Kasurau mari kasurau.
Kasurau awak sembahyang.
Dirantau awak di rantau.
Dunsanak di kampung jan sampai ilang..♥
Tidak ada komentar:
Posting Komentar